మాంచెస్టర్: ప్రపంచకప్‌లో భాగంగా న్యూజిలాండ్‌తో జరిగిన తొలి సెమీస్‌లో భారత్ 18 పరుగుల తేడాతో ఓటమి పాలైంది. అడుగంటిన ఆశలను తిరిగి రేకెత్తించిన జడేజా అవుటయ్యాక మ్యాచ్ స్వరూపం మారిపోయింది. ధోనీ అవుటయ్యాక ఫలితం తేలిపోయింది. మ్యాచ్ అనంతరం టీమిండియా కెప్టెన్ విరాట్ కోహ్లీ మాట్లాడుతూ.. కివీస్ తమకంటే ధైర్యసాహసాలు ప్రదర్శించి విజయం సాధించిందని కొనియాడాడు. బంతితో తొలుత అద్భుతంగా రాణించినప్పటికీ బ్యాటింగ్‌లో ఘోరంగా విఫలమయ్యామని, తమ ఓటమికి అదే కారణమని పేర్కొన్నాడు.
న్యూజిలాండ్‌ను ఛేదించగలిగే స్కోరుకే అవుట్ చేసినా లక్ష్య ఛేదనలో చతికిలపడ్డామన్నాడు. తొలి అరగంట ఆట మ్యాచ్ ఫలితాన్ని తారుమారు చేసిందన్నాడు. నిన్న బాగా రాణించామని అయితే, న్యూజిలాండ్ బౌలర్లు అద్భుతంగా బంతులు సంధించారని ప్రశంసించాడు. జడేజా అదరగొట్టే ప్రదర్శన చేశాడని ఆకాశానికెత్తేశాడు. ధోనీ మంచి భాగస్వామ్యం అందించాడని అన్నాడు. అయితే, విజయానికి చేరువగా వచ్చి స్వల్ప తేడాతో ఓటమి పాలయ్యామని పేర్కొన్నాడు. విజయానికి న్యూజిలాండ్‌కు అన్ని విధాల అర్హత ఉందన్నాడు. ఆ జట్టు తమకంటే బాగా ఆడిందని, తమకంటే ధైర్యం ప్రదర్శించిందని ప్రశంసలు కురిపించాడు. ఈ సందర్భంగా తమకు మద్దతుగా నిలిచిన అభిమానులకు కృతజ్ఞతలు తెలిపాడు.
No comments:
Post a Comment